اعرف لهجتك..الحسانية المبسطة…/ أحمد فال محمد أبه

(بعيدا عن السياسة والناموس، واگطيع كوراه.. هذه بعض المصطلحات الحسانية ومعانيها.. :

*- اطيار العين: عدم التركيز على شيء معين، وعدم القناعة بما عندك.. وتقريبا ثلاثة أرباع “المواطنين الأعزاء” يعانون من “اطيار العين” اعل كل شي.

.*- عينو ماهي فاگفاه: شجاع ..*

– عينو ما فيها الْبَلَّه: ما يحشم من شي شين عدلو، وال من كذبة وگفت اعليه.. تعرفو طبعا الأمثلة، ما يحتاج انگولهالكم ..*- اطيار الجّعْرَه: الوقاحة، والبلژه وقلة الحياء..

*– اطيار اسْبَاقة : انسيخة ولقسيلة …

*- طول العين: البحث عن الأفضل دائما، وكثرة اشگارة، وعزة شي زين، يسو من أي نوع.. طبعا “المواطنين الأعزاء” عينيهم ماهم اطوال في الإنجازات و إگر فيهم أي شي عدلتو الحكومة، يسو لعاد تگسام المقاسل والصابون....

*– طول ارْجِلْ: كثرة الطوطيح .. والوصول إلى مكان ما يالل عادة الشخص إجيه بيه اللي ما إدور فيه شي.. كيف زيارة ولد عبدالعزيز ذيك الساعة لكوريا الشمالية.. ومنه أيضا كثرة الزيارات الخارجية لغزواني..

*– طول اظْهَر: لعواج وگلت اخلاص الدين .. كيف ذاك اللي خالگ للحكومة اللي تگبظ قروض مدة سدادها 30 و ال 40 سنة وتعگب امل ما اتخلصها ، وتطلب من الدول المانحة أنها تسمح الها....

*– طول الكَرَّه: حد ما يوفاو عندو الأمور، وإتم إكررهم ، ويدحس.. تقريبا كيف هذا اللي خالگ للتلفزة الوطنية امع مسلسل الزير سالم ، وكان خالگ الها امع مسلسلي “عصر الأئمة” و”عمر بن عبد العزيز”

*– كبر الكرش: حد ما يكتفي بنصيبه، وإتم يطلب الزيادة دائما.. وأحيانا يوكل گرعة غيره .. *

– تكبار الكرش: ذاك اللي خالگ لوحدين متخيل الهم أن غزواني لاهي إمصرن عزيز وال يگلع منو شي من الفظة وإردو لخزينة الدولة.. وشاكين املي أن فخامته لاهي يحبس حد من وزراء العشرية ((اللي هو واحد منهم )) وال إكدر اعل حد منهم..

*– كبر الخِيم : الترفع عن الصغائر، والسعي دائما إلى معالي الأمور.

.*- كبر التّيخ (التاء ثقيلة): البلگة .. وشي ثاني..

*- ابلا كُوكْرِي: يصرط كل شي، وما يمدق.. بالضبط كيف الحكومة اللي توكل لحديد والذهب والسمك .. والقروض ..

*- ابلا احنوك: ژفاط ..

*- ما يتمطگ : كذاب ..

*– ما إگول كلميتن أخوات: كذاب.

*- ما يِلْگي : كذاب..

*- مافيه الوسواس: كذاب.. طبعا المثال الذي ينطبق على المصطلحات الخمسة أعلاه، تعرفوه كاملين ..

*- ابياظ لُذِنْ: اتژيوين وعزة الغناء ..

*– اكحال لُذِن: ذاك اللي خالگ لولد عبدالعزيز ..

*– خفّة ليْد = السرقة، واكبيظ حد الشي ماه لُ… بالضبط كيف ذاك اللي خالك للمسؤولين والوزراء مع المال العام.

*– اغسل ايديه من شي = أوفَ منو نهائيا، ولا اتل شاد فيه لخبار.*

– انفظ أيديه منو = (غالبا من آرواكيج) أوفَ منو، وخاب أمله فيه.. كيف اللي خالك للشعب امع صوملك *

– داخل ليْد = مستسلم.. وال زاد مستلين..*

– تحت ليد = متوفر ..*

– مارك ليْد = عكس داخل ليْد..*

– بين ليْدين = مُتوقع، وال مبرمج..*

– ماه بين ليدين = عكس بين ليدين..*

– تدخال لصباع افشي= اشكاره، والتتفيه دائما، كيف ذاك اللي كان خالك للمعارضة (ذيك اللي ما تلات خالكة) مع مشاريع الحكومة في زمن عزيز..*

– اتمعليم اذراع = القوة *

– الطّوبيص = ما نعرف كلمة واحدة تشرحها، يغير ألا كيف التعيينات في الحكومة اللي ما عندها معيار ثابت ، ألا “يطوبص” الرئيس وال الوزير اعل حد وإعينو..*

– التاسدبيت = المشي الدحميس